Statistikk og framskrivingar

Samtidig som kvaliteten på, og omfanget av, helsetenestene har auka over tid, ser vi at levealderen til innbyggjarane òg har auka. Det er ei positiv utvikling som skal halde fram i åra som kjem. På same tid skaper det utfordingar for helsetenestene. Gjennom planperioden vil dei eldre utgjere ein stadig større del av befolkninga, og skape vesentleg større behov for helsetenester. Det heng saman med at eldre menneske i snitt har fleire sjukdommar enn yngre, og at behandlingsmoglegheitene aukar.

Fram mot 2050 viser framskrivingane at den prosentvise veksten i aldersgruppa 67 år eller meir i Helse Vest sitt nedslagsfelt er stor. Veksten er særleg stor blant dei aller eldste. Ifølgje framskrivingane blir talet på innbyggjarar som er 90 år eller eldre meir enn tredobla. Tala viser samtidig ein negativ vekst i aldersgruppa 18-49 år, frå rundt 2030. I 2050 kan vi ha fått rundt 32 000 færre innbyggjarar i denne aldersgruppa enn vi har i dag.

Flyttemønsteret er generelt prega av ein netto tilvekst i dei mest sentrale kommunane, mens det er ei netto utflytting frå dei minst sentrale kommunane. Det er i størst grad yngre innbyggjarar som flyttar, og det skaper eit skifte i etterspurnaden etter helsetenester og tilgangen på arbeidskraft. Innvandring og nye kulturar påverkar òg tenestene.